HBO Max-მა ჰარი პოტერზე სერიალის გადაღება დაანონსა. სერიალის იდეა ჯერ კიდევ ახალია, რის გამოც მაყურებელმა ამ ეტაპზე არ იცის, ჰარი პოტერის სამყაროს რომელი პერიოდის განმავლობაში განვითარდება მოვლენები.
სერიალის სიუჟეტის, ქრონოლოგიურად, პირველ ვერსიას ალბათ ჰოგვორტსის დაარსება წარმოადგენს. სალაზარ სლიზერინის, გოდრიკ გრიფინდორის, ჰელგა ჰაფლეფაფისა და როენა რეივენქლოს დაუჯერებელი და თავგადასავლებით აღსავსე ეპოქა, რომელიც უამრავი თავგადასავლის მოყოლის საშუალებას იძლევა: როგორ დაარსდა მსოფლიოში საუკეთესო ჯადოქრობისა და მისნობის სკოლა და როგორ შეიქმნა საიდუმლო ოთახი, სადაც ბასილისკომ დაიდო ბუდე.
ასევე მაყურებლისთვის საინტერესო იქნება, სერიის უდიდესი ანტაგონისტის განვითარებას დააკვირდეს. როგორ დაიწყო ტომ რიდლმა ძალის მოკრება, და როგორ იქცა ლორდ ვოლდემორად. როგორ შეხვდა ერთგულ მსახურებს, ბელატრისა ლესტრეინჯს, ბარტი კრაუჩ უმცროსსა თუ სხვებს, როგორ მოიპოვა მათი ერთგულება, რა შემზარავი საქმეები ჩაიდინა, როგორ მოატყუა რეივენქლოს მოჩვენება, შექმნა ჰორკრუქსები თუ დახოცა ჰარის მშობლები.
თუმცა პოტერჰედებისათვის ყველაზე სასურველს მაინც, ონავრების ისტორია წარმოადგენს. როგორ შეხვდნენ ერთმანეთს უერთგულესი სირიუსი და ლუპინი ჯეიმსს, და მათ ამდენად „სრულყოფილ“ წრეში, როგორ აღმოჩნდა მოღალატე პიტერ პეტიგრიუ, როგორ შექმნეს მათ ონავრების რუკა და შეუერთდნენ ფენიქსის ორდენს.
ჯერ-ჯერობით უცნობია, როგორ და სად განვითარდება სიუჟეტი, მაგრამ როგორც The Verge იტყობინება, სერიალის გამოსვლასთან დაკავშირებით ეჭვები უკვე აღარ არსებობს. მაყურებელს აღარ აქვს კითხვა „გამოვა თუ არა ჰარი პოტერი სერიალად“ – ამჯერად ისინი ელიან პასუხს კითხვაზე – როდის.