ამერიკელმა მომღერალმა, მადონამ მუსიკალურ ინდუსტრიაში ყოფნის 40 წლის აღსანიშნავად მსოფლიო ტურნე, სახელწოდებით „The Celebration Tour“ დააანონსა. როგორც ცნობილია, 64 წლის მომღერალი ტურნეს კანადაში, კერძოდ ვანკუვერში 15 ივლისს დაიწყებს და 1-ელ დეკემბერს ნიდერლანდებში, ამსტერდამის Ziggo Dome-ში დაასრულებს.
პრესრელიზის თანახმად, „The Celebration Tour“ აჩვენებს „მადონას არტისტულ მოგზაურობას ოთხი ათწლეულის განმავლობაში და პატივისცემას გამოხატავს ქალაქ ნიუ-იორკის მიმართ, სადაც მუსიკალურ ინდუსტრიაში მისი კარიერა დაიწყო“.
ცნობისთვის, „The Celebration Tour“ მადონას რიგით მე-12 საკონცერტო ტურნეა. ბოლოს მან მსოფლიო ტურნე 2019 და 2020 წლებში გამართა, თავისი ალბომის „Madame X“-ის მხარდასაჭერად.
მადონას „The Celebration Tour“-ის ბილეთების გაყიდვა 20 იანვრიდან დაიწყება. მსურველები მის შეძენას, ასევე კონცერტების ლოკაციებთან დაკავშირებით ინფორმაციის გაცნობას, მომღერლის ოფიციალურ ვებგვერდზე შეძლებენ.