2021 წლიდან Apple TV-ს ყველა დროის ერთ-ერთი ყველაზე გავლენიანი sci-fi ისტორია ემატება. ახალი სატელევიზიო შოუ, სახელწოდებით „Foundation“, ცნობილი ამერიკელი მწერლის, აიზეკ აზიმოვის წიგნზეა დაფუძნებული.
შოუს თიზერი 22 ივნისს გასაჯაროვდა და დიდი ინტერესი გამოიწვია როგორც სერიალის მოყვარულებში, ისე აიზეკ აზიმოვის მკითხველებში. სერიალი სამეცნიერო ფანტასტიკის ჟანრს მიეკუთვნება და მოგვითხრობს მეცნიერი ჰარი სელდონის ისტორიას, რომლის აღმოჩენაც მეცნიერებს მომავლის წინასწარმეტყველების საშუალებას აძლევს. გალაქტიკური იმპერიის დაცემის მოლოდინში მყოფი სერიალის მთავარი გმირი გადაწყვეტს შექმნას “Foundation” (ერთგვარი ფონდი), რომელსაც ევალება, შეინარჩუნოს კაცობრიობის ცოდნა ცივილიზაციის გასაახლებლად.
სერიალის გადაღებებს ხელმძღვანელობდნენ ჯოშ ფრიდმენი და დევიდ გოიერი. რაც შეეხება საპროდიუსერო კომპანიას, შოუზე მუშაობდა დევიდ ელისონის „Skydance Media”, რომელსაც ეკუთვნის ისეთი ცნობილი ნამუშევრები, როგორიცაა Star Trek Into Darkness, World War Z და Annihilation. ფილმის ქასთში კი შევხვდებით ცნობილ მსახიობებს: Cassian Bilton, Jared Harris, Lee Pace, Laura Birn და სხვა.